[Beeld]

Irene reik haar derde CD uit; beweeg uit Tina Turner se skadu



Datum: 971204
Kategorie: musiek
Uitgawe: PLUS
Bladsy: 014
Naamlyn: Martjie Roos
Nommer: 446416
Publikasie: BEELD
Rubriek: Ligte Klanke
Irene het pas haar derde CD, Evergreen, waarop sy 'n hele rits ou gunstelinge sing, uitgereik.
Dié sangeres, wie se stem al baie met dié van Tina Turner vergelyk is, sê sy het lank gesukkel om uit die Tina Turner-skadu te kom. ``Ek was die afgelope paar jaar baie skrikkerig om te veel covers op te neem anders sou ek nie my eie identiteit kon vestig nie.''
Vir haar eerste CD, Die ander ek, het sy net twee bekende treffers van oorsese kunstenaars opgeneem en vir haar tweede album, Vrou, het sy net oorspronklike, nuwe materiaal opgeneem.
``Maar ek het talle briewe van bewonderaars ontvang wat gevra het dat ek tog 'n CD met treffers moet opneem.''
Irene het 'n lys van treffers en bewonderaars se gunstelinge saamgestel en ook 'n paar van haar eie by dié lys gevoeg.
``Evergreen was ook een van die liedjies op die lys en ons het later besluit om dit die titel van die CD te maak omdat dit die tydlose gees van die meeste liedjies op die album vasvang.''
Irene sê almal wat al na dié CD geluister het, aan haar sê dat een of twee liedjies daarop vir hulle herinnerings oproep.
``En ek glo dat enige goeie liedjie tydloos is.''
Irene sing benewens die rits bekende treffers soos When I Need You, The wind beneath My Wings, Love Hurts, The Rose en Loving Arms ook 'n paar oorspronklike Afrikaanse liedjies soos In die middel en Die wonderlike liefde van 'n ma (albei geskryf deur Mynie Grové) en Steve Hofmeyr se Wie is die vrou in jou arms vanaand. (Laasgenoemde liedjie was ook op haar eerste album, maar die vraag daar na was só groot dat sy besluit het om dit weer op te neem.)
Irene en Rina Hugo het vanjaar tydens die Steve en vriende-toer na verskeie dorpe hegte vriendskapsbande gesmee.
``Ons het tussen konserte vreeslik met mekaar gespot en mekaar nageboots. Ek het partykeer soos Rina probeer sing, terwyl sy my hoëhakskoene aangetrek en my op die verhoog nageboots het.'' Hulle het agter die skerms een keer die liedjie I Know Him So Well saamgesing en toe het Irene besluit dié duet saam met Hugo is 'n moet vir haar nuwe album.
Irene, wat in Januarie in die voorprogram van die groep Smokie gaan optree, en haar gesin het 'n paar jaar gelede Johannesburg vir die rustigheid van Shelly Beach in KwaZulu-Natal verruil.
``Dit voel partykeer of 'n mens permanent op vakansie is en dit is heerlik om ons kinders, Vaughn en Irene-Louise, by die see groot te maak.''
Om ma én sangeres te wees, verg deeglike beplanning. Wanneer sy toer, moet sake só gereël word dat haar ma by die kinders bly of dat haar man, Louis, nie uitstedig is nie.
``En as dit moontlik is, toer die kinders partykeer saam. Vaughn het omtrent op die verhoog grootgeword en is gewoond aan die vermaaklikheidswêreld.''

Irene sê haar man, die promotor Louis van Wyk, is beslis haar grootste kritikus.
``Toe ek Louis destyds ontmoet het en nog in die groep Chess gesing het, het ek altyd gewonder of ek enigsins enigiets reg kan doen op die verhoog.
``Maar deesdae gaan dit gelukkig beter en as hy my wel kritiseer, beskou ek dit altyd as positiewe en opbouende kritiek.
Irene sê sy is 'n rolmodel vir baie tieners en sy kry gereeld briewe van tie ners wat met probleme soos dwelms worstel.
``Ek probeer maar altyd om hulle te help en van die regte raad te voorsien of om hulle na deskundiges te verwys.''
En as hulle haar vra wat hulle moet doen om eendag 'n sangeres te word?
``Dan raai ek hulle altyd aan om eers formele sangopleiding te kry. Daar word vandag al hoe meer druk op kunstenaars geplaas om veelsydig te wees en die mededinging word al hoe groter.''
Sy probeer altyd 'n produk skep waarop sy trots kan wees.
``Dit gaan nie vir my oor hoeveel plate ek verkoop of hoeveel geld ek maak nie. Die opbrengs van my plateverkope skenk ek aan liefdadigheidsorganisasies en geld is dus nie 'n belangrike faktor nie.

``Die belangrikste is dat iemand daar buite of dit nou 15 of 15000 luisteraars is van my musiek hou.''


Kopiereg © 1997