|
Susan Booyens Senior omroeper / Regisseur: Radio sonder Grense het die volgende te sê gehad oor Karin “Met die uitreiking
van Karin Hougaard se album “Bly” in 1994 het sy haarself sonder twyfel
bewys as een van die opwindendste jong stemme in Afrikaanse musiek, maar
terselfdertyd is sy ook ‘n “veteran” wat op 16-jarige ouderdom reeds die
ATKV Crescendo gewen het – die jongste algehele wenner ooit! Daarom is hierdie
album van hoogtepunte uit haar loopbaan tussen 1983 en 1993 so interessant: dit
dokumenteer die groei wat plaasgevind het tussen die baie jong popklank van
byvoorbeeld “Lui Telefoon” en die rypheid in stemkleur van “Always Love
You”. Karin
was 18 jaar oud toe “Eerste Afspraak” in 1983 vrygestel is en sy palm
daardie jaar ‘n Sarie Toekenning vir Mees Belowende Sangeres in. Dit is
destyds heeltemal tereg beskou as ‘n baanbrekersalbum – as’t ware die
eerste popmusiek in Afrikaans. Vyf jaar later volg “Herontmoeting”. Dié
album spog reeds met baie van Karin se eie lirieke; en kan gesien word as ‘n
logiese voorloper tot die uitstekende “Bly” wat ‘n meer volwasse en
introspektiewe klank het. Op “Hoogtepunte” kry ‘n mens ‘n heerlike
oorsig van die pad wat ‘n sangeres soos Karin moes loop om haarself te vestig.
Niemand bly 18 nie, maar dit is belangrik om te onthou waarvandaan ons kom. Nou
sien ons net uit na haar volgende album!”
|
